كثير منكم سمع بمصطلح السعرات الحرارية وعجز السعرات وزيادتها ولكن مايعرف طريقة عملها او كيف يوظفها لصالحة ويخليها تخدمه في تحقيق هدفه 🎯 هذا المقال راح يوضح لكم ان شاء الله الموضوع اتمنى لكم المتعة والفائدة.
اولا: خلونا نعرف السعرات الحرارية:
السعرات الحرارية هي الطاقة الكامنة في الغذاء. يحتاج الجسم باستمرار إلى الطاقة ويستخدم السعرات الحرارية المكتسبة من الطعام لكي يواصل عمله وأداء وظائفه.
ماراح ادخلكم في كلام علمي كثير بحاول اشرح لكم بطريقة بسيطة على الامثله التالية:
شخص رقم 1 👤 (وزن زائد)
شخص رقم 2👤 (نحيف)
ادوات البناء 🛠 (طعام)
عمال 👷(الايض)
بناء 🏠 (الجسم)
خل نبدأ بالشخص رقم 1👤 ( وزن زائد):
هذا الشخص قاعد يعطي العمال ادوات بناء زايدة عن الحاجة مسرف شوي وكل يوم يغرقهم بالادوات والمعدات لدرجة هالعمال ماعاد يعرفون يشتغلون طول اليوم شغلهم يخزنوا ادوات البناء هذي في المخزن (اماكن تجمع الدهون مثل البطن) والشخص هذا المسرف مو مقدر انه العمال ماعاد عندهم مكان ومايقدرون يبنون بشكل صحيح بسبب المبالغه هذي وهو مستغرب كل يوم يشوف بطنه يكبر ويكبر.
طيب اذا هذا الشخص يبي يلحق على نفسه ويخفف على عماله ويكون المبنى حقه جميل ومرتب وش يسوي؟
بعلمكم وش يسوي، نحسب سعراته الحرارية في المواقع اللي تحسب لك السعرات او في موقعنا حياة صحية وفرنا لكم حساب السعرات الحرارية بمبلغ رمزي 10 ريال، يتم فيه حساب السعرات المناسبة لهدفك وايضا سعرات الثبات.
عموما …
نرجع لموضوعنا، حسبنا سعرات هذا الشخص وطلعت 2200 سعرة حرارية، نقوم ناخذها ونطرح منها 300-400 سعرة او حسب جسمه وماتبالغ في انقاص السعرات عشان ماتتعرض لمشاكل الايض وسوء التغذية وغيرها، وعشانك راح تضطر بعدين تغير السعرات ( بنشرحها في مقال اخر )، بعد ماطرحنا 300 سعرة صار عندنا 1900 سعرة حرارية، لمن يبدأ هذا الشخص المسرف ينقص الادوات على العمال العمال راح يروحون المخزن وياخذون منه الادوات اللي خزنوها سابقا ويشتغلون فيها ( تبدأ عملية حرق الدهون).
ممتاز كذا فهمنا وش يحتاج الشخص رقم 1 👤 عشان يوصل لهدفه🎯.
الشخص رقم 2 👤 ( نحيف):
هذا الشخص عكس الاول بخيل شوي ومايعطي العمال كفايتهم من الادوات واذا عطاهم يوم منعهم اسبوع او عطاهم بالقطارة وبعدين يزعل عشان العمال مو قاعدين ينجزون شغلهم وبنائه ضعيف وتعبان ويحتاج يقوى، طيب وش الحل؟
تعال اعلمك، انت عمالك يحتاجون تزيد الادوات يعني اذا انت تعطيهم 1500 لازم تزيد وتصير تعطيهم 1800 وهاه لا تبالغ في الزيادة عشان بعدين حتى انت راح تضطر تزيد سعراتك.
لمن تبدأ تزيد المعدات يوم عن يوم عمالك كانوا سابقا بس يحفرون ومو قادرين يبنون، الحين صاروا يبنون شوي شوي وكل يوم عن يوم يتحسن بنائك، وعليك بالاستمرار الله الله…
وكذا فهمنا وش يحتاج الشخص رقم 2👤 عشان يوصل لهدفه🎯.
لمن الشخص رقم 1 والشخص رقم 2 يتبعون هذه الطريقة تعرفون وش يصير؟ راح يصيرون اشخاص معتدلين ومتوازنين لا هم مسرفين في العطاء ولا هم بخيلين وبنائهم راح يكون ممتاز وقوي وثابت، ولكن عشان يوصلون لافضل مرحلة ينقصهم شي وش تتوقعون؟ 👀
صح!!
نشاط بدني مناسب وهذا اللي راح نتكلم عنه في المقال الجاي بإذن الله.
اتمنى لكم الفائدة والمتعه وبإذن الله يكون هذا طريقكم الى #حياةـصحية.